Kuki Mizo Zomi - Salai Lahnim

Kan artikal hmasa-ah “Lai Chin Zo” tih thupuia hmangin thil awmzia kan sawi tawh a. Mahse, buai lohna tur thil te tham te-ah hian kan buai thin si a. Chuvangin, kan thupuia thumal pathum te khi kan sawifiah leh dawn a ni.

1.1. Kuki

Hmanah chuan India lam atanga Chhinlung chhuak te koh nan an hmang thin a. Tunah chuan Manipur State a chengte bik Chin ho sawina tawngkam a lo ni ta. Mahse, an zingah hian he thumal pawm hahdam thei lo hi tam tak an awm a, chu chuan thil chinfel a hun tawh zia a tilang chiang hle.
“Kuki” tih thumal hi Rawlins-a lehkhaziak ah “Cuci” tiin 1787 ah a vawikhatna atan a rawn lang a. Tichuan, a sipeling te herdanglamin “Kuki” tih a lo piang ta a ni. Assamese leh Bengali hoten Chin ho deusawha an kohna tawngkam a ni a, a awmzia chu “tlangmi” tihna a ni. Chu chu British roreltu thenkhat ten an lo hmang a, “Kuki” tiin min lo chhinchhiah a. Mahse, hnam dangin deusawha min lo kohna, pejorative term a ni tih chhinchhiah a tha. Kan hming dik tak a ni lo. Hei hi “ Kuki” inti te pawhin an pawm a ni.

1.2. Mizo

“Mizo” tih thumal hi “Zo” tih thubul atanga lokal a ni a, a awmzia chu “tlangmi” tihna a ni. He thumal hian sawi bik leh kawh bik, specific signification a nei a, Lusei leh a sangawi zawnpui, “saphun” hote sawina a ni. Mizorama cheng zawng zawng sawina a ni lo.
Mi tam takin, Chhinlung chhuak ho sawi nan an hmang a, tihngheha tihlen zel pawh an tum. Mahse, huapzo ziarang a keng thei lo. “Mizo” tih thumal thinlung ramah hian Asho te, Cho te, Khu te an leng ve lo. Huapzo hnam hming ni loin, chibing hnam hming a ni. “Mizo” ni tur chuan “pawm” a, “remtih”  a ngai a; Lusei tawng nal tak a thiam a ngai. Chumi hnuah pawh “Mizo diktak” nih chu a la har cheu. Hei hi ka tawn leh ka hriat thil a ni. A changin “America” tih thumal nen an tehkhin thin: a awmzia chu Mizorama awm zawng zawng chu “Mizo” an ni tihna. Mizorama Gorkhali hote, Chakma hote, Bengali hote pawh hun rei tak ata an lo awm tawh a, mahse “Mizo” an ni lo. Kan chanchin, history a thlang kan tlakpuite an ni lo. “Mizo” tih hi politik thumal ni loin hnam hming, ethnonym a ni.
Mizo ah saphun engemaw zat an awm a, chungho chuan Mizo vek kan ni tiin an pute an tlangaupui thin. An chipuite tam tak, Baal hmaa thingthi ngai lo ho hi saphun ho hian an duhna lamah an hruai tur a ni lo ang. “Fa u ber” tiin hla ah te an chawi thin. Hei hi bihchian ngai ka tih chu ni: fa u ber chu kumah teh a ni si a. Chuti a nih chuan “Mizo Hnahthlak” tih tawngkam pawh hi ennawn leh ngai chu a lo ni ta. Chibing politics ngaimawhtu Mizo politics pawh a inenchian a tul ta.

1.3. Zomi

“Zomi” tih thumal hi “Zo” tih thubul atanga lokal a ni a, a awmzia chu “tlangmi” tihna a ni. Mi tam takin Chhinlung chhuak Chin ho zawng zawng sawina a ni e, an ti thin. Mahse, kan enchiang dawn a ni. “Zomi” tih thumal kan sawi hian, sawi bik, kawh bik, specific signification a nei a, chu chu “Paihte” ho leh a chipengte an ni. A huang zauh tum thin mah se, thinlung ramah kan leng ve lo. “Zomi” ni bik ngawih ngawih hi an awm ve a ni. Chu chu a nihna tak pawh a ni a, huapzo hming, cover term atan chuan a tling lo a ni.
Zomi kan tihte, Mizo kan tihte hi chibul hming, generic terms ni lo in chibing hming, tribal names an ni. Chuvangin, Mizo-nisation thlipui kan kalpui dan pawh Aizawl hian a ennawn a ngai a ni. Kan insuihkhawm dan pawh hi enchian a ngai ta. Hmangaihna ah te, inunauna ah te, zalenna ah te, intluktlanna ah te bul a thut loh chuan, intihbingna leh intihbuaina mai a hringchhuak dawn, chuvangin kan fimkhur a tul a ni.

A tawpna ah chuan “Kuki” tobul te, awmzia te leh a sawi bik te kan sawi tawh a. “Mizo” lo chhuahna bul leh awmzia te, a sawi bik te leh tihchingpen a nih zia te kan sawi bawk a. “Zomi” tih pawh a thubul leh a kawh bik kan sawi tawh bawk a ni. Tichuan, huapzo hming, cover terms ni lo in chibing hming, tribal names an nihzia chiang takin a lang a ni. “Kuki” erawh chu hnam dangin deusawha min kohna, pejojrative term a ni.